Dia 30 di desèmber 1949 SENTRO KULTURAL KORSOU a ser lanta,ku e meta pa promové bida kultural na Kòrsou na e manera di mas amplio posibel. E tempu ei na Hulanda tabata eksistí un interes grandi pa promové interkambio di kultura entre Hulanda, Antia Hulandes, Indonesia i Sürnam. Naturalmente ,huntu ku esei tabata eksistí tambe, e afan pa laga esnan ku tabata biba leu for di Hulanda, disfrutá di loke ekspreshon kultural hulandes tabatin pa kompartí.

Entre esnan ku a traha duru pa yega na formashon di e sentro kultural nos por menshoná

Dr. Cola Debrot ken a bira tambe e promé presidente, sra. May Henriquez, J. W. Bennebroek Gravenhorst i e konosido speshalista di wowo L.A.G.O.Lashley.

Entre e presidentenan a figura entre otro srs. Rudolph Quast, J.W. Bennebroek Gravenhorst, Frank Jas, L.A.G.O. Lashley, J. Abraham, E.S. Pieters Kwiers, R.A. Hodgson, C.J. Penso, R.T. de Palm, sra. Beatriz Doran-Scoop i sr. Elvio Cijntje.

Aktual presidente ta Henri Cornelia.

 

Na su prinsipio CCC tabata tin lasonan estrecho ku e biblioteka akadémiko (wetenschappelijke bibliotheek), kaminda e tabatin su ofisina. Aktividatnan prinsipal di CCC tabata, organisashon di eventonan kultural manera konsierto i obranan teatral tantu trese for di Hulanda komo esnan produsí lokalmente. Nos por menshoná aki e obranan "Marí di Malpais" i "Juancho Picaflor".

Tambe CCC a konose despues e fenomeno di artistanan dirigente di obra di teatro ku tabata bini un temporada pa dirigi obranan manera "Ilushon di anochi", "Laiza porko sushi" i "E pober yaya".

CCC tabata manehá e tan famoso sine trùk den añanan 50 i 60, un manera popular pa hiba sine den bario i laga pueblo sera konosí ku susesonan na Hulanda via e Polygoon Filmjournaal ku tabata pasa promé ku e sine prinsipal.

Durante su eksistensia CCC a move riba tur tereno di kultura ku eksposishon di kuadro, eskultura, obra di man i fotografia.

CCC a promové teatro via su mes produkshonnan i tambe dor di spònser gruponan emergente manera "Arte Proba" di Anthony Jamanika.

Riba tereno di literatura CCC tabata organisá enkuentronan literario, spònser buki i supsidiá biahanan pa eskritornan.

Riba tereno di baile CCC a inisiá lèsnan di balèt na su sentro na Skalo i último añanan a organisá lèsnan básiko di baile folklóriko i tambe pa maestro di baile dirigí pa e konosido Cesareo Jean Louis.

Riba petishon di teritorio insular di Kòrsou CCC na aña 1972 a tuma maneho di Muzik school Curaçao na su enkargo. E nòmber di e skol a ser kambia na aña 1999 pa Akademia di Músika Edgar Palm komo homenahe na un di nos mas grandi músiko, kompositor i alabes te na su último aña di bida fungiendo komo dosente di piano i ka'i òrgel na nos Akademia.

Na e Akademia ta duna entre otro lès di piano, kitara, keyboard, fió, kuarta i mandolin, blòkflùit, tròmpet, trombon, saksofon, drùm, perkushon, kanto i AMV (algemeen muziekvormend onderwijs).

Na e momento aki nos tin alrededor di 600 alumno na e Akademia. E aktual gerente di sekshon di músika ta sra. Carollina Nicolaas.

Vários alumno di Akademia di músika a sigui studia músika despues na konservatorio na Hulanda o na Estádos Unídos. Algun di nan ta bèk komo dosente na nos Akademia. Nos tin tambe eks alumnonan ku a i te ainda ta destaká internashonalmente manera Randal Corsen, Tania Kross, Eric Calmes, Izaline Calister i Pernell Saturnino.

 

CCC por a kubri su gastunan pa medio di supsidio ku e tabata risibí for di Hulanda i tambe fondonan ku e mes tabata generá. E supsidio for di Hulanda tabata bini di STICUSA (Stichting Culturele Samenwerking). Esaki tabata un fundashon ku Hulanda a lanta speshal pa stimulá interkambio kultural entre Hulanda Antia i Sürnam. Despues ku Sürnam a haña su independensha e fundashon su trabounan a terminá. Na su lugá a bini e ora ei e asina yama OKSNA (Orgaan Kulturele Samenwerking Ned.Antillen). Esaki tabata kai bou di enkargo di gobièrnu sentral i tabata kanalisá tur supsidio riba tereno kultural for di Hulanda pa Antia.

Na 1998 CCC a ser renobá totalmente ku fondonan di KABNA I Sede Antia pa un kosto total di 1.2 mion florin antiano.

 

Na aña 1999 Hulanda a tuma e desishon pa stòp tur supsidio pa kultura na Antia. E desishon aki tabatin konsekuensha grave pa fundashon CCC. Danki na yudansa di Fundashon BON INTENSHON i despues REDA SOSIAL, CCC por a mantené su operashon habrí na un manera limitá.

 

Na aña 2003 CCC a logra sera un asina yamá "Zorgkontrakt" ku teritorio insular di Kòrsou i asina garantisá un kontinuidat pa e operashon di CCC i su aktividatnan. Asina CCC a drenta un periodo nobo den kua por a sigui desplegá otro aktividatnan banda di e Akademia di Músika, e.o lèsnan di baile, Papiamentu, melodia i letra, konta kuenta, kurso di pinta i ekspreshon liber.

Den su afan pa siguí promové nos Kultura di antaño CCC a prepará un proyekto grandi "Ka'i Òrgel ta bai Skol".

E proyekto ta konsistí di un cd i un dvd interaktivo ku informashon tokante historia i desaroyo di ka'i òrgel.